FUUTA
Ngel mo suwaa lummbo woto jal jooliiɗo
Sibu mo suwaa maayde tagdaaka
Ɗuum teeŋti e hannde e fuuta
Ñiiɓirde jaambareeɓe, seerenɓe e waliyaaɓe
Leydi jaɓɓe e dinndeeje
Ɗibbe e baŋtiŋŋeeje
Ɗooje e ceeweele e ciluɗe e gijile
Ganni maa ko aljanna
Remooɓe awooɓe e aynaaɓe
Nde wonnoo gawri ina heewi
Mbaarudi saɗtaano
Toɓo toɓat-noo ko e seeno
Rega e ñaaruuje
Waamma e caalli
Pete ŋeeɓoo
Beeli cora
Hakkunde baraawo e ndiriire
Puɗi mbewa nguboo
Ƴellita ŋari leydi
Neema bey baali e baqareeje
Sooño majja joote njooloo
Ilo ila maaje coora haa nguufa
Joñoo jireele
Heege majja joote njooloo
Seeɗa alaa ceeɗaaɗo woodaano
Ko kolli jirwuɗi e sabareeje
E oon sahaa duuminooɗo
Hannde noon ko woondu
Kala ganndunooɗo hanki maa
Toɓo toɓaani
Ilam ilaani
Sooño haawi hanndiima
Heege ñippii araraay
Puɗi maayii ɓoliima
Jawdi halkiima
Kullon mbiidii
Remooɓe lorlii
Aynaaɓe najii
Awooɓe paayii
Ko weeɓnoo saɗtii
Hay toɓɓere nattii dañeede
Ñawu ne sompii mbaggu ñoriima
Cafrorɗe ko pehe mehe
Ngalaa so wonaa kaayitaaji
Ɗo dogee waɗii
Ɗo tiindee alaa
Uujo uddii dame
Nana tammbii gaawal
Happaani miskineeɓe ngaanii pusii
Fuuta ñaarii olii
Wontii biille e karaaje
NJAAY Saydu Aamadu
