Ngatamaare Sammba toɓa
Yimɓe ndawra jañnja
Ngatamaare sahoo leppa
Huɗo fuufa jawdi fof morsa
Muumon ndilla come ciika
Gedde cekka paaɓi ŋaaka
Jawdi e yimɓe fof cofta
Ngatamaare baban ɓuuɓol e keccol
Njurum e yurmeende
Duule ndunngu majje e maaje
Golal e gollal demal ndeenka
Juuɗe e jullaale e juññinanɗe gayi
Ilam e pusam dawol e demal
Arano beyaat haa tataɓo
Saro e ƴaro bawɗi e baaɗi
Baɓɓati e bamɗi girji
Caalli e beeli colli caɓi e cooji
Kiwal kelal manngo mumi
Paggiri piice murtooɗe
Poɗɗe dene jaheeje e jaaɓe
Mumi paggiri e makka
Ngatamaare maayirde ceeɗu
Naatirde ndunngu wilto e morso
Ngatamaare baban kiwal e kelal
Kesal naro e coñal
Dimngal rooɓto lappere
Ɓetu asakal dimle nguurnaandi
Ngatamaare baban ndunngu
Ngatamaare yuman beeli e biidi
Ngatamaare jam e jaleeɗe
Jibina yaajeende e haaranduru
Haa jawdi fof wilta wuro e ladde
Haa ceeɗu doga woɗɗitoo
Kawle loma ngarda e welnere
Pijirlooji jamma e dingire
Sarooji jakkunde gure
Pelle-pelle cente-cente
Sagataaɓe mbasondira ɓuraa finde
Ɓuraa tiiɗde ɓuraa suusde
Ɓuraa jolde ɓuraa faamde
Haa yello cer taagara e diwngo dutal
Haa diwel lori e ñakkoo
Piccel ngori e baydi yagga njaaloo
E dingire jammaaji dabbunde
Ngatamaare haayoo maa
Koɗo belo koɗo ɗaminanooɗo
Tooli maa kooni a jaɓɓaama
Mammadu Abdul SEK « Feetere Jeyngol »
