Won goonga mo njiymi deƴƴotaako
Etee so mi haalaani mi weltotaako
Heɗto! haa mi joofna a luundotaako
So a faamaani pammito-ɗaa a heñotaako
So a faamii ngaraa pirtaa ba jokka ba waylotaako
So a faamaani a rewaani nganndaa a ɓamtotaako
Goonga ko naŋtaade e ko tiiɗi ɓoccitaako
Mo naŋtii e laaci mbati maa teɓɓitto heɓɓittaako
Gila jikke aynaaɓe paamii e ngaynaaka hanki naŋtotaako
Caggal nde yooro anndini ko ganndal woni ko waasotaako
Njanngen ko nafata woortotaako
Ko noon aduna addiri hoto wiy a waylotaako
Janngin ɓiye ko nafata woortotaako
Ko noon aduna addiri hoto wiy o waylotaako
O jannga sariyya e quraana o naftortaako
O fiilee Alfaa e laafa mum tiiɗka ka seekotaako
Tee so o naamndaama gannde o jaabotaako
Tawa ko tabsiiru tabiiɗo baasi mo Allah weltotaako
Tee go’o kuɗi e ɗiɗi leɗɗe so winndaama, o tottaama renndintaako
O jannga, o reena, o rokkee, o naftortaako
O liggidoo eɓe njanngaani taraani ngardoo o ardotaako
Etee omo jaggaa ko o ganndo o ƴeewtotaako
Meccal makko ko roondaade ko teddi o roototaako
Mate goonɗinde Allah ko weleede leɓteede e baasal ƴeewtotaako
E jaŋnde, ngardinen ɗemɗe men gaa goɗɗe en njoolotaako
Dimo ko pooccidiiɗo e ɗemngal mum goɗɗe luɓotaako
Njanngen sariyya e quraana no aduna salortaako
No janngooɓe ɗum gannde goɗɗe ɓe ɗehotaako
Afriknaaɓe, afriknaaɓe njanngen gannde ɗe ngoppotaako
Teeŋti e fuutankooɓe fantuɓe ɓe keɗtotaako
Janngooɓe kebbina naftortaako, mbaajototaako
So a waajiima mbiymaa hoddiro dogotaako
Tawa ko kamɓe koddirani ɗum koye maɓɓe haalotaako
So a haalii ɓe nawmaa to artotaako
So en njannginaani ɓiɓɓe men lekkol e gannde kese en ɓamtotaako
Diimaajo hannde ko mo janngataa heɗtotaako
So nulaaɗo ene yamiri gollaade e aduna no maayotaako
Waɗdude heen gollanaade laakara no aduna wuurotaako
Mo naatnaani ɓiyum lekkol tooñii ɗum haa haalotaako
Ngam janngo o nafataa hoyre makko goɗɗo o miijotaako
Ko miin yurmaa kon almudon kon ɗaanotaako
Ñawkon paawnukon kon cafretaake cafrotaako
Pil-piltinoowon e laabi kon nehotaako
Tekke e potuuji kolɓooji ngalɗukon kon ɓuftotaako
Ŋakkukon nehdi yumma e baaba kon keɓtotaako
Njurum jinnaaɓe kon nganndaa miijotaako
Nduwatookon kon nganndaa ko firt,i kon kirtotaako
Ndoondi duɗal e damuɗe galleeji kon njeewataa ngoɗotaako
Kon nganndinaaka so wonaa maayde nde woortotaako
E malaykaaji kasbooji ɓooli jamɗe doondiiɗi ɗi ndoototaako
Piyooji gooɓɓe canndolinɗi ɗi piikintaako
Mate ko heddii ko kam janngotaako?
Neɗɗo wuurda noon tawa caɗeele e manngu kumtotaako
Etee duuɓi keewii jaŋnde ruttantaako
Nimsa naatii hankadi heɓtotaako
Mi ruttoo e becek tee heen galle darotaako
Mi ɗannoo ɗanle duumiiɗe goɗɗuɗe mi ruttotaako
Tawa joyi duuɓi e galle am mi leewtotaako
Ɗo majjere hulɓinii ɗo haalotaako
Ko kaalɗaa fof mbiye-ɗaa ko a majjuɗo, ndaa ɗum yeddotaako
Ko kaalɗaa fof mbiye-ɗaa ko a jedduɗo, ndaa ɗum yeddotaako
Caloɗen wonde seernaaɓe meernaaɓe ɓe meertotaako
Eɗen takka Allah wiyde gannde ndagotaako
Tawa ndiwoowa e ndeegoowa ko gannde peewni ɗum yeddotaako
Leɗɗe safaara e nguura kaayitaaji janngirteeɗi binndirteeɗi ɗi ndogotaako
Mo takki Allah ɗee geɗe o yaafotaako
So o naamndaama janngo ko o wiynoo o jaabotaako
Ngam joom men ene yamiri gollaade haa e nguurndam a yowittaako
Etee mo anndaani hannde e nguurndam fooccotaako
Gadiiɗo ma e suudu reentinmaa jaalal a buɓɓotaako
So a jaɓaani, mbuɓɓo-ɗaa, mbarmaa, ndutto-ɗaa nder a ruttotaako
Yo ganndal lomto majjere nde naftortaake naftortaako
Haa caɗeele majjere e heege njalta oo nokku nduttottaako
Cheikh Umaar BAH
