Baɗal ko Rogere mawnde e nder doosɗe celluka ɗemngal baawngal wonde fof, tee kadi ko caɗgal hiɓindodaade coomsoome mum, gila e mahngo muume maggal, haa e pirlitogol majje.
Ina moƴƴa ciftinen baɗal pulaar muumal feccii ko e pecce 3:
1). Daande baɗowal
2). Daande baɗotoongal
3). Daande baɗangal.
Ɗee daaɗe tati, walla ɗii Goomuuji 3, Goomu heen fof ina jogii mahngo mum heeriingo r pirlitogol mum keeringol e Timmungal e Jogorngal.
Kala jannguɓe pirlitogol pulaar ina kumpitii no maale mbayka heen fof no siforii.
Tawde jaabawol men ngol toɗɗii ko Jogorngal 3, tawi kadi ko daande baɗowal yahdunde e lawirde walla seekirde (in), baɗnirgel, ko alaa e sago ko adii ɗuum, ndokken yeru pirlitogol baɗal Jogorngal 3, nde daande baɗowal, nde yahdaani e lawirde:
Arde: ar + at = o arat
Noddude : nodd + at = o noddat
O janngat.
Ɗoo, maande sahaa walla maande mbayka ndee, hono at oo, ina feeñi haa laaɓti, e nder pirlitogol J3, daande baɗowal.
Waɗi noon ko ɗaɗol baɗal ngol ina hisi.
Kono, e nder yoga e ngaddinaaji at oo ina wonta an walla ay.
O janngat
Wonta :
O janngan
O janngay
Mbiyen an e ay fof calti ko at ko kanko woni maande mbayka lasliire, ɗiya ko koytinaaɗi haa wowlaango newoo.
Seede ɗuum ko so en pirlitii baɗal ngal e Jogorngal 4 walla Jogorngal diiwtungal, alkulal t maande mbayka ndee feeñat, kono wonaa n walla y feeñata.
Sabu hay gooto wiyataa :
/O janngana, (tawa faanditaa heen ko J4/ sellataa
/O jannganaa 
diiwtungal jogorngal, tawa faanditaa heen ko diiwtungal jogorngal, sellataa.
diiwtungal jogorngal, tawa faanditaa heen ko diiwtungal jogorngal, sellataa.So en payii e baylogol at wonta tu, sababuuji mum e daande baɗowal ko ɗiɗi.
1). So tawii daande baɗol nde yahdii e lawirde walla seekirde mahiinde e LM, yeru : – in, an, oy, or, id, ina hasii laaɓngal maande mbayka ndee saamat, ngam newnude wowlaango, alkulal u, ngal alaa faayiida e celluka dartoyoo yeeso t, maande mbayka J3.
Yr : janngude
O janng + in + at =
O jannginat
= O janngintu
Hakkunde o jannginat e o janngintu ɓuri newaade wowlude ko : o janngintu
2). So tawii baɗal muumal wonii diiwtungal keerol, ngaal woni baɗngal ko ɓuri laaɓngal gootal.
Yr: firlitde, haljitde, saamolinde, …
Yr : o firlit + at =
O firlitat.
Ngoo ɗoo wowlaango ina teddi, kono ɓurata welde wowlude walla weeɓde wowlude ko :
Firlit + tu =
O firlittu
O haljittu
O dajjittu
….
Pirlitogol baɗal baawngal wonde fof, teeŋti noon e diiwtungal keerol walla ɗisngal lawirde, pirlitogol mumen ina ɓeydoo jiiɓaade, sabu sammintu laaɓngal nanal, hono no njiyru-ɗen e ɗii yeruuji nii. Kono huunde heen fof ina jogii doosɗe, ɗo tuugnaa.
Pooye Pelle Pulaar kuɓɓii hoto docotte wiɗtiyankooɓe e winndooɓe ŋakku!
Ko ɗo Alla mballinto-ɗen to Arwannde e to Wattannde yo O wallu e wuurnude ɗemngal ha ngal yettoo e tolno ɓurɗo rommoliɗde e tolno guurɗe ɗee.
Kuɗol : ATK, doosɗiyanke.
