Ngon-ɗen ko e leegal Arafat, ko dille cente cente yimɓe jogiiɓe bidoŋaaji, siwooji dogdognooɓe ine njiyloyoo ndiyam. Halimata Gise, debbo koriiɗo dañde ndiyam, e wiyde makko soforeeɓe bamɗi yeeyooɓe ndiyam ɓeydii coggu barille mumen.
Teskaama gila nde ndiyam kuppi faade jooni, gollotooɓe heewɓe hatojinɓe e ndiyam ndartinii golle mumen ɗoo e laamorgo ngoo. Usmaan Caam ñootoowo paɗe teeŋtinii hay so jippiima ine horoo dañde ndiyam ko ɓuftii.
Ŋakkere ndiyam huuɓtidinnde nder laamorgo ngoo, woni hannde ngoƴa mawka ɗum saabii yoga e sarɗiyankooɓe njuɓɓinii jeewte ngam wiyde Ghazwaani e laamu mum poti ko woppude laamu nguu ngati ngalaa hattan tammbaade maa ñawndude caɗeele dookotooɗe ɓesngu leydi ndii. Khaali Jallo sarɗiyanke batirde ngenndiire Muritani. Ine artana en, e fekkuru ndiyam.
E wiyde jaagorgal diƴƴe sabaabu taƴgol ndiyam ɗam ko toɓooli doolnuɗi, garɗi ɗee balɗe e pakitgol loopal ɓakke nder diƴƴe Senegaal haa 70 ujunere m3 ine ustoo ñalawma fof, tawi wonnoo ko 130 ujunere m3 ñalawma fof.
Siftinde subaka hannde oo, hooreejo Muritani waɗii njillu mbettungu to diiwal Trarza saraaji Kormaseen wuro ɗo ndiyam ummortoo Nuwaasotnaaɓe ngam anndude hol ko waɗi ndiyam ŋakkude?
Ciimtol: Jaayre Pinal-JP
