Caggal nde hooreejo leydi Muritani itti gardinooɗo gollordu toppitiindu Ndiyam hono Mohamed Mahmuudu Wul Jaafar. Batu jaagorɗe waɗii hannde altine 21 juko toɗɗiima Hamza Caam gardiiɗo kuuɓtidinɗo gollordu toppitiindu ndiyam. Hamza Caam, jeyaa ko e falnde Mbaañ wuro Ñaabina. O woniino gardiiɗo gollordu Arab toppitiiɓe jamɗe ine wiyee SAFA, eɓe njokkondiri e SNIM.
Oo ɗoo Hamza, toɗɗegol makko e oo posto bettaani wonande annduɓe dewrewe dawriyankooje makko. Wuro Mbaañ ine sabbinoo ko wayi nih gila nde suɓngooji ɗii ɓenni. Ndee falnde fof e waɗde jagge keewɗe jannguɓe, ine ŋakki yiytaade hoore mumen e laamu Ghazwaani, ɗum waɗi seeraani e kala sahaa eɓe ngoytoo ɗum, wiyde wonde ko ɓe yejjitaaɓe.
Sahaa suɓngooji ndee, kanko Hamza o gollaniima no feewi lannda laamu nguu, ɗum wallitii lannda INSAF foolde, nder wuro Mbaañ tawii ko poolgu ngu alaa guli. Lannda kaa dañi sarɗiyankooɓe ɗiɗo, fawi junngo kadi meeriiji 3 nder meeriiji 4 gonɗi e falnde Mbaañ. Yeddinaani, ngol toɗɗegol wonanaani Hamza Caam bettere. Teskaama sahaa oorngal suɓngoyankeewal, Hamza darinooma laŋ ngam INSAF heɓa poolgu e suɓngooji ɗii.
Hamza Caam ko neɗɗo dawriyanke, jaggal mawngal nder lannda INSAF, ine teskaa ko ɓuri heewde e konnguɗi makko woni ɓamtaare falnde Mbaañ. Ɗum saabii, o seerataa hollirde e hesɗitinde fiɓnde makko e lannda laamu nguu, kam e waɗde garwanɗe miijanteeri lannda kaa.
Jaayre Pinal-JP
