Fuuta so a innaama
Ƴiiƴam lalla e ɓernde am
Miijooji muusɗi koɗoomi
Ɗoyli ngeggana mi
Aduna soofta mi
Ñamri mbelndi mettita
Haaju bona
Mi haamtoo
Mi saɓɓitoo
Mi miijoo hanki maa
Hanki mo mi tawaaka
Saanga e saangaaji
Nde kolli mbeli mbeeɓaani
Jammaaji dingire
Boombi e sagataaɓe
Lew-lewe demminaare
Fuuta
Gila naange maa muti
Lewru maa ronki ummaade
Sammba arani ngenndi en
Ngarii cuuɗii
E caggal fiyaaka moggi
Gannde maa njeddaa mbirnii
Aadaaji maa puuynaa cuuɗii
Ngalu ma wujjaa
Neɗɗaagal maa tamaa
Fuuta
So a innaama
Miijooji muusɗi koɗoomi
Ɓiɓɓe maa hanki ko yontaaɓe
Hannde ko wostaaɓe
Jaleeɗe hanki
Bojji hannde
Jaambaraagal hanki
Ɗaminaare hannde
Dimaaɗi mbirgii
Waɗɗotooɓe ngoodaani
Añɓe heege ɗomka
Majjere e ñawu
Ndookii galle baaba
Mbiyi kala jaltuɗo mi taƴa
Hol to hammaayerooyel woni?
Dannga yumma mum yooliima
Boolummbe ngullii lukii njehii
Maaje ɓeeɓii
Ndunngu ko e miijo heddii
Gese cooyii Biille keewii
Dingire pusii
Awooɓe aynaaɓe remooɓe
Ɗannaniima ndii jawdi
Ndi ɓe njiytataa
Ngontii reenooɓe galleeji
Ɓee laamɓe hesɓe
Hesooɓe ngalu ngummingu
E doole miskineeɓe
Ɗe ɓe njooɗii
Liggotooɓe e ndii mbaylaandi
Ndi waylataa joote
Fuuta
Tuubaak wiy a fuutii
Sabu yimɓe ma o fuuntii
Kono tuubahaako ina woocee
Ndeke fuunti no bacce
So toɓo iwraani dow
Yo toɓo iwru les
Aduna bonaani ɓooy
So doole ndonkii
Yo doole keɓɓo
So kalfaandi juutii
So jawdi fuuntii
So janfa hoynii
So ɗaminaare fuuynii
Yo ndimaagu futtu
Yo yonndikinaare ittu
Yo hoolaare lottu
Yo katantaagal dottu
Añɓe yo ottu
Kalfaandi yo nattu
Jam yo artu
Bojji yoo caɗtu
So laaɓaani yo en mbaɗtu
Ibraahiima SAAR
