Hol ko woni haawniinde?
Mi haalan ma ko woni haawniinde
Haawniinde ko ɗo Dimo rimndaa dimle, regginaa
Haawniinde ko ɗo kowhowo furetee, fuuptee
Haawniinde ko ɗo ñamminatnooɗo
Dakmittoo e kedde keddantenooɗo
Haawniinde!
Hol ko woni haawniinde?
Mi haalan ma ko woni haawniinde
Haawniinde ko ɗo ɓakkere ɓaakiinde ñaametee
Haawniinde ko ɗo nehoowo larbetee
Haawniinde ko ɗo tedduɗo hoynetee
Haawniinde!
Hol ko woni haawniinde?
Mi haalan ma ko woni haawniinde
Haawniinde ko ɗo kersoowo ɓolotoo yeeso fasɗe mum
Nattuɗo yeeytaade
Haawniinde ko ɗo esiraaɓe naatdata e sutura
Njahda dow wuro
Haawniinde!
Hol ko woni haawniinde?
Mi haalan ma ko woni haawniinde
Haawniinde ko ɗo mawɗo hulata jaabaade kecco
Haawniinde ko ɗo suka saannotoo
Haaya e mawɓe
Haawniinde ko ɗo kaaraysira, dokko
Suuɗotoo e niɓɓe,
Mumɗoo ngabbon no doombel
Haawniinde!
Hol ko woni haawniinde?
Mi haalan ma ko woni haawniinde
Haawniinde ko Tata Walataa!
Kono dummbirdu dummbitto
Kono dammbordu dammbitto.
Jibriil Hammee LIH
(Dummbirdu Walataa 18/11 /1988 )
